Qum təpə yox olmaq üzərə
قوم تپه یوخ اولماق اوزره
ایکی ایل اؤنجه «قوم تپه یوخ اولماق تهلوکه سینده» آدلی بیر مقاله ده قوم تپه نین یوخ اولماق تهلوکه سینده اولدوغونو اوخوجولارا سؤیله یرک، دوغا سئورلر باشدا اولماقلا یئتگیلیلری ده اویارمیشدیم. آدی گئدن مقاله نئچه- نئچه درگی، سایت و بلوگدا باسیلیب یاییلدی. آنجاق بونلارین سونوجو نه ایدی؟
سون واختلار ایچیمده دویدوغوم قورخویا باخمایاراق قوم تپه یه گئتمه یه قرار وئردیم. او گون، همین قورخو دویغوسو قوم تپه یه یاخینلاشدیقجا آرتیردی. بو قورخو اونجا دا یئرسیز دئیلدی. آخی اوشاق دا بیلیر، کیچیکلی- بؤیوکلو یوک ماشینلارینین باسقیسنا معروض قالان کیچیک بویوتلو بیر چؤلون باشینا نه گله بیلر. نهایت گئدیب قوم تپه یه چاتدیق. گؤردویوم گؤرونتویه اینانمیردیم. دونوخوب یئریمده قالمیشدیم. ائله بیل تالانچیلار- دوغا دوشمنلری، ایشلرینی یاخشیجاسینا یئرینه یئتیرمیشدیلر. زاواللی قوم تپه سون نفسلرینی چکیر، سون گونلرینی یاشیییردی. هله ده قوملار، سون قوملار داشینماقدا ایدی. هله ده یوک ماشینلاری لودرله دولدورولوب منه بللی اولمایان یئره داشینماقدا ایدی.
دوغرودان دوغرویا قوم قیتلیغیدی! یوخسا سورومسوز اینسانلار سوروملولار سوسدوقدا، کیشیسل قازانجلاری و بیر آز راحتلیقلاری اوچون هئچ بیر ایشدن چکینمیرلر. حتی بو قازانج و راحاتلیغین باهاسی اونلارین سویونو ایچدییی، چؤرینی یئدییی، قوینوندا- قوجاغیندا بویا- باشا چاتیب، بسله ندییی یورد- یووالارینین داغیلماسی اولسا دا بئله.
چوخ اوزگونلوکله دئمه لییم؛ آرتیق بوگون بیر تهلوکه دن سؤز گئتمیر و آرتیق 6 کیلومتر کوادراتلیق قوم تپه دن دانیشا بیلمه ریک. بوگون من جان اوسته اولان، سون گونلرینی یاشایان، کیچیلیب- کیچیلیب شیریخ بیر قوملوغا دؤنوشن قوم تپه دن دانیشیرام. نه یازیق کی، یازماقدان باشقا بیر زاد الیمدن گلمه دی و گلمیر و نه یازیق کی، گؤردویوم گئدیشله، قوم تپه ایله ایلگیلی اوچونجو یازینی یازا بیلسم چوخ گومان کی، باشلیغی «قوم تپه آنیلارا قوووشدو» کیمی بیر باشلیق اولاجاق.
سایین اوخوجولار بو بلوگدا گئدن یازیلاردان یالنیزجا اؤز یازیلاریم منیم باخیش و دوشونجه لریمی عکس ائتدیریر. باشقا یازیلار، حتی کؤچوردویوم و چئویردیییم یازیلارین بیر بؤلومو یا بوتونو منیم دوشونجه و باخیشلاریمین ترسینه ده اولا بیلر.
