.:::اولو اولوس:::.

 قوم تپه یوخ اولماق تهلوکه سینده 

_{محمدرضا خیری فام}

      _{تبریزین 35 کیلومئترلییینده، تبریز- صوفیان جاداسینین یاخینلیغیندا ایکی قوم تپه  واردیر. بیرینجیسی آدیندان دا بللی اولان کیمی، قوم تپه سیدیر. ایکینجیسی ایسه همین تپه دن آدینی آلان 539 نفر نفوسو اولان بیر کنددیر. بو یازیدا بیرینجی قوم تپه دن سؤز گئدیر.}

      _{یئر اوزونون اوچماغی (جنتی ) اولان آذربایجانیمیزین دوغاسینین هر بوجاغی گوزللیکلرله دولودور. نه قدر گزیرسن گزمه لی و گؤرمه لی یئرلری قورتولان دئییل. گؤزللیکلری ایله گؤز اوخشایان مئشه لر، آغاجلیقلار، گؤللر، چایلار، بولاقلار، شیررانلار، داغلار، تپه لر و دره لر چوخلو داغچی و دوغا سئورلری چکیب او یئرلره آپاریر. آنجاق قوم تپه نین اؤزللییی و گؤزللییی نه داغیندا نه سویوندا نه ده یاشیللیغیندادیر. قوم تپه باشقا بیر وارلیقدیر. گؤزلری، سؤیله نیلن گؤزللیکلره آلیشان آذربایجانلی لار بورادا اینانیلماز بیر گؤرکمه تانیق( شاهید) اولورلار. سانکی یئر آغیز آچیب، 6 کیلومئترلیک سیرا قوم تپه لرینی پوسگوروب. بوراسی دونیانین بعضی اؤلکه لرینده اولان بویوک و سونسوز کیمی گؤرونن قومسال چوللوکلرین کیچیک بویودور. داغلیق بیر بؤلگه نین ایچینده اولان کیچیک بیر چوللوک.}

      _{آما آذربایجانین ائکوسیستم چئشیدلی لییینین تایسیز و اؤزل اؤرنکلریندن اولان قوم تپه، قازانج و منفعت دن باشقا بیر زاد دوشونمه ین تالانچیلارین الی ایله هابئله سوروملولارین باخیمسیزلیغی و اعتناسیزلیغی سونوجوندا فابریکالار یؤنوندن گئت - گئده آرادان قالدیریلیر. بورادا کیچیکلی - بؤیوکلو ماشینلار قوملاری داشیماقدادیرلار. بو یؤندن یعنی ماشین یولو ( ؟! ) ایله اوسته چیخان کیمسه لر تپه نین شوملاماغی ایله تهلوکه یه دوشه بیلرلر. قوشقوسوز تپه نین تالانماسی دوردورولماسا یاخین گلجک ده قوم تپه آدلی بیر یئر قالمایاجاق. چون کو بورادا نئچه مین یا نئچه یوز کیلومئترلیک قومساللیقدان هئچ خبر یوخدور. سؤیله دیییم کیمی قوم تپه نین بوتونو 6 کیلومئتر کوادرات دیر.}

     _{من، قوم تپه یوخا چیخمادان، بوتون اوخوجولاردان قوم تپه نی تانیتدیریب، یوخ اولماق تهلوکه سینده اولدوغونو باشقالارینا چاتدیرمالارینی هم ده گئدیب اورانی گؤرمه لرینی ایسته ییرم.}